ШҮҮХИЙН САХИЛГЫН ХОРООНЫ ДАРГА, ГИШҮҮД БҮГД НАЙРАМДАХ ИТАЛИ УЛСАД АЛБАН АЙЛЧЛАЛ ХИЙЖ, ТУРШЛАГА СУДАЛЛАА
2025-03-28 0Шүүхийн сахилгын хорооны дарга Д.Ариунтуяа тэргүүтэй төлөөлөгчид 2025 оны 3 дугаар сарын 17-21-ний өдрүүдэд Бүгд Найрамдах Итали Улсад албан айлчлал хийлээ.
Айлчлалын хүрээнд төлөөлөгчид Итали Улсын Шүүхийн дээд Сургууль, Шүүхийн дээд Зөвлөлийн төлөөлөлтэй уулзаж шүүгчийн сахилга хариуцлага, тэдний олон нийтийн цахим сүлжээнд мэдээлэл түгээхэд тавигдах хязгаарлалт, шүүгчийн сахилгын шийтгэлийн төрөл, сахилгын хэрэг хянан шийдвэрлэх ажиллагааны талаар санал солилцсон бол Итали Улсын Дээд Шүүх, Хууль зүйн яаманд зочилж, шүүгчийн хариуцлагын тогтолцоонд эдгээр байгууллагуудын гүйцэтгэх үүргийн талаар мэдээлэл авлаа.
Айлчлалын үеэр Монгол Улсаас Итали Улсад суугаа Элчин сайд Ц.Нарантунгалаг төлөөлөгчдийг хүлээн авч, Ром хотод хэрэгжиж буй олон талт хамтын ажиллагааны талаар танилцууллаа.
Энэхүү айлчлал нь Европын Холбооны техникийн туслалцаа, мэдээлэл солилцох хөтөлбөрийн хүрээнд зохион байгуулагдсан бөгөөд Монгол Улсын шүүгчийн сахилга, хариуцлагын тогтолцоог сайжруулахад үнэтэй хувь нэмэр оруулсан төдийгүй хоёр улсын шүүх эрх мэдлийн байгууллагуудын хамтын ажиллагааг бэхжүүлэхэд чухал ач холбогдолтой үйл явдал болж өндөрлөлөө.